Ingxoxo Enkulu YomGinwa nomKristu - Isiqendu soku-I
(Redirected from Ingxoxo Enkulu YomGinwa nomKristu)
- Ibhalwe ngu-W. W. Gqobha
Laa madoda ayencokola ehleli ngasebuhlanti, encokola ngezinto ngezinto, ade azakuphathelela nangezaseZwini; imfundo; imibuso, owasemaXhoseni nowaseLungwini. kubonakele ngexesha elifutshane efudumala omabini laa madoda, elowo exhathise ngelakhe icala.
Usukile uphakade likhoyo sele efudumele, wawuncoma umhlaba, wayebongisela nagobuKristu, nemfundo kwanombuso wasemlungwini, wazek'ezantsi ukuthetha kwakhe, wathi:-
- Umhlab'uyolile, kunguwo loo nyaka,
- Usuka amadlu, udloba utwela;
- Utalas'igidi, umnandi Wancama,
- Uyolis'udlubu, unawamatshamba.
- Uthembis'ubuntu, ubong'isidwandwa,
- Unaz'izinyanya, wothusa ngezanya;
- Ayabheka-bheka onk'amagqobhoka,
- Angen'eluhlwini, ayawutelela.
- Umhlab'uyolile uvus'ukudala,
- Ziintlombe, 'migidi, kwaneziheula;
- Kusinw'ingodwane, 'miqolo yenamba,
- 'Midudo, kuleqa akukho 'qhitala.
- Kusilw'imithayi, kusel'windlolothi,
- Kuselelw'ukufa nasezikolweni;
- inkol'itshitshile, iphel'isidima,
- 'MaKristu ziintusi, ngooJingqi-mabala
- Kusil'idyakana, kujole omdala,
- Kusil'ootitshala kunxil'abantwana;
- Akukho mahluko kumKristu neqaba,
- Bahleli behluthi, indyeb'eliteya.
- Umhlab'uyolile, ungath'usafika,
- 'Kulila imbande yomthi Wotalaso;
- Yotywala bomXhosa, bucim'izinqgala,
- Buncas'inombiza enyanga umxhelo.
- Izimi kaThixo, 'Manxiwa kuphela,
- Kumke bafundisi, kulil'izikhova,
- Ezityalikeni kukwaMnebese,
- Kufiwe impela, kusingwa kwasemva.
- Imfundo yintoni, baph'oonyana benu?
- Baqgibe laa mazwe, befun'inikisi,
- Yona nto ifunwa ziintaka iinkuku,
- Kusa ziqondele, kuhlwe zingayiboni.
- Baxwaye ngxowana, zizele ngumoya,
- Ziihabile saka apha zimdakana;
- Banxule tasana 'zinoonodyuwana,
- Benama phetshan'okuqhathanisela.
- Bemke nale mfundo niyenze igugu,
- Nithi inithimba nibe niyincoma;
- Bemkile kwaphela namangaba-ngaba,
- Bemke nesigubhu sotywala bomlungu.
- Ziph'iintombi zenu, iZwi liyintoni?
- Zigqibe lo mhlaba zifun'ooMisisi;
- Ziqeshe zindlwana, ziqhum'ulwamity,
- Zivum'oovayise ezindlolothini.
- Nalahl'amakhazi nalahla ikhaya,
- Namhla nizigudu kwanamabungelo
- Nivinjwa neendaba, nenziw'abantwana,
- Ningamafikwana angooNxu-mkhonjana,
- Nafane nalahla, umbuso wakowenu,
- Nagalel'emzini watshona owenu;
- Nifana kwanathi, niphoko-phalala,
- Ngombus'enikuwo, nidumb'amaqeba.
- Suduka mfondini, akukho nto into,
- Yekani sisele, sinxile sitshabe;
- Akukhont'isento, umhlab'uphelile,
- Nambuzo, namfundo, naliZwi, tu nto-nto.
- Sesincamamisa, nangona sekunje,
- Kwakula masiko, aseluhlangeni,
- Sasivele nawo, kwasemandulweni,
- Sincamis'umxhelo, sesifile kade.
- Simfaninye nani, akukho mahluko,
- Kumbuso, kwimfundo, mawo mawoshe,
- Yizani sisele, sidude, sixhentse,
- Sibhubhe siphele, ooKhunu badane.
- Iqaba, gqobhoka, bahamba ngepasi,
- Nomvuz'ukwanjalo nasentsebenzweni;
- Kwindlala nezifo, kwirhafu nomthimbo,
- Ndifung'umkhwekazi, induku nentambo
- Siselel'ukufa thina boomaqaba,
- Side sitshonele siye kooLwanganda;
- KwiNyangw'ephezulu, siye kundileka,
- Kub'asithakathi, asikuya kutsha.
- Simke kwezi rhafu, nombus'olidlaka,
- Waaqondwa kudala, kwangamarhanuga;
- Alahla ancama, kwanamaHintsathi,
- Namhla yonke loo nto, mathol'esagwityi.
- Umhlab'ubonga, kujub'izigweba,
- Kuvuk'izigxabe nakumagqobhoka;
- Inkolo ibhitye yaba yintshwenyane,
- Ingine, inzonze, yaba lubivana
- Ifuz'ulovane ludyojwe ngentshongo,
- Ngemin'elishushu ilanga lehlobo,
- Lona lufinyela lube liqothwana,
- Lunesizotholo sentsila yecuba.
UZWELIZAYO
- khawupheze mfondini, khawuyek'ukunaba,
- khawubuy'izithende, iingcinga ziingxuthe,
- Uye kwezo mini ulilela zona,
- Ukuba ngazo ke waathin'uNtsikana?
- Engekho umlungu, bungekho notywala,
- Esaxel'ukuthi, 'Lumkani maXhosa,'
- Ngasempumalanga kuza imiphanda,
- Nasentshonalanga kuz'ifatyazana
- Zombin'ezondywala zitsolele kuni,
- Ze nizicezele, lukhwekhwe lwexhwili;
- Ziza neshwangusha, nosala nenkwitshi,
- Umgqephe bubuthi noba ngamaswili.
- Umhlab'uyaqhwesha, umhlab'uyahlela,
- Uthembis'inkongo, ufumbath'umoya,
- Kulandel'isanga, kuthembis'isithunzi,
- Kuthemb'umshologu, kufaml'enkungwini.
- Kuvel'amabala, uxel'ulovane,
- Uqhatanisela njengay'ingqumeya;
- Umhlaba uvele wanaw'amatshamba,
- Ulidlongodlong'welizibhekamacala.
- Umhlaba yimbulu, unxib'ezobuntu,
- 'Kanti unomsila, uzingel'impuku,
- 'Lizwe lasemzini, lidl'ankonazana
- Linje ngengxangxosi, liphosa mcingana.
- Bangaphi na wethu abamke kumdaka,
- Bengenalw'ithemba, lingekho nekhaya,
- Begxothiwe apha,besazakhamele
- Ezint'uthi wena zicim'izingqala?
- Uth'umhlab'uyole, uyol'uyintoni?
- Ungenazingondo zando ziziinyani?
- Aphi amandulo abantu bokuqala,
- Bemka kwenjenjani, bawushiya ngazwi ni?
- Buphi na ubuntu, buphi na ubumnandi?
- Kuhluthwa, kududwa, kusemgidini,
- Kubi kuxheliwe nako zintonjane,
- Kubi kwalusiwe ngamakhandilili.
- Uphi na umncono wamanz'anobomi?
- Khawuxele kaloku sicaka sobhelu,
- Nguban'ongalili ziintsizi neentlungu,
- Ziindlala, nezifo, nguban'ongangcwabi?
- 'Zizungu nobubi nguban'onganxili?
- Ngamashwa, miphanga, nguban'ongaguli?
- Zikhulu zityebi, nguban'ongazili?
- Bamfaninye bonke, akukh'usileleyo.
- Ziph'inizityebi zemali neenkomo?
- Ziphi na iinqili zabonwabileyo?
- Izizwe zomhlaba ziya zixhwithana,
- Ngethambo lomhlaba zisagxagxisana.
- Zibhushulisana, zimfamekisana,
- Zisene hokoha, kwanalo igode,
- Le nzuz'engenafa kwelizay'ilizwe,
- Emk'umnt'engumsuxa ongumpha wezala.
- Ziph'in'izikhulu, ziphin'iindwalutho
- Ekade zifuye zonke, zonk'ezonto;
- Zashiy'elemincili kwaneziyolo,
- Ziph'inizigondw'ezimis'imixhelo?
- Uqhayisa ngesono, umnand'onesinkwa?
- Osukela umntu kusan'engcwabeni?
- Loo nto lidongwane lokufa nemasi.
- Yiva ndikutyele, ezintw'azinafa.
- Wod'umke na gxebe, ufel'esonweni?
- Uxele inkumbi, efel'emcingeni?
- mfondini wakwethu, 'du lenze iguqu.
- Nganeno kwengcwaba kuzanyelw'izulu.