AMABHOKOBHOKO ZIINTSHATSHELI ZEHLABATHI

Amabhokobhoko ziintshatsheli zehlabathi, belime ngxi ilizwe loMzantsi Afrika kwinyanga yonke yoMsintsi neyeDwarha sukela amakhwenkwe kaNeinaber antingela France kiwindebe yehlabathi yombhoxo. La makhwenkwe enze imbali engenakulityalwa phantsi kwelanga phezolo ngokucambalalisa iNewzealand kuntsintsintsi womdlalo kamagqibela kankqoyi kwibala iStade de France ngamanqaku ali12 kwali11^[1]. Ithenjwa lesizwe uPollard uphinde walityatha emagxeni eli loMzantsi Afrika njengesiqhelo ekhokelela la madodana kwiphumelelo yawo yesine yale tumente. Ephakathi kwenginginya yezitatanyiswa ebezilapho uMongameli Ramaphosa uzibonele ngawenyama zingqubana ngeentloko ekudala zizondaba.

Uthe usompempe akumkhomba ngaphandle uKolbe^[2] wayibon'uMzantsi Afrika intlaka iphuncuka sele isemlonyeni kodwa azibamba zaqin'iintonga amakhwenk'amkhulu suka yahlahlamba impempe ngomzuzu wama80 inqand'amanzi angangen'endlwini. Wankxakam'uMzantsi Afrika uteya usithi camagu^[3], ukanti ibizizililo eNewzeland^[4]. Yabe iya eAfrika iWebb Ellis Cup okwesine nto leyo ibiqala ngqa ukwenzeka ezimbalini ukuba le ndebe iphunyelelwe liqela izihlandlo ezine.

Iinzingo nempumelelo zeqela eFrance

Ngaphambi kontingela eFrance, amakhwenkwe kaNeibaber ayengenathemba ncam emveni kokuba umkhokeli uSiya Kolisi^[5] noHandre Pollard^[6] babonakele kodwa yaba luvuya xa umkhokeli elulama kwimizuzwana phambi kobizwa kwamagama amatyendyana aya kwindebe. Yena uPollard wabizwa esekhaya ukuba ayolamla emveni kokonzala kukaMalcom Marx nokubonakala ukuba izinga letumente alimlingenanga uLibbok emveni kokudlala kuhle kakhulu neSikotilani. I-Ireland yabetha eli loMzantsi Afrika ngamanqaku asibhozo kwali13 kumdlalo owawutaka iintlantsi wokulwela isicoco (group stages)^[7]. Ngelixa agqitha nzinginzingi amadodana kwiFrance kodwa ekunyamezeleni ayihlaba ngentshuntshe evalweni yalala ngophotha zagqithela kwiNgilane ezikaKolisi zenza esezolo, angena kumagqibela kankoqoyi ayinabisa iNewzealand.

Iingxoxo ekhaya

Emveni kwempumelelo yamadodana ombhoxo oosopolitiki namanye amaqela aphikisayo afana le-Economic Freedom Fighters (EFF) elikhokelwe nguJulius Malema lenza isankxwe ngale mpumelelo bambi besithi abantu abantsundu boMzantsi Afrika bekungafanelekanga ukuba babhiyozela eli qela kuba lisaqhubekeka lisebenzisa umfanekiso webhada nemibala eluhlaza eyayisetyenziswa ngexesha lengcinezelo kwaye eli qela alifani neNewzealand ephakamisela phezulu inkolo nenkcubeko yabantu beli lizwe.^[8]

Imithombo yolwazi

[1] ttps://www.nytimes.com/2023/12/08/sports/rugby/world-cup-south-africa.html

[2] ttps://www.news24.com/sport/rugby/worldcup/boks-owed-it-to-inconsolable-kolbe-after-late-sin-bin-in-rwc-final-we-made-a-plan-20231030

[3] ttps://www.dailymaverick.co.za/article/2023-10-29-we-won-springboks-joy-as-they-beat-all-blacks-in-rugby-world-cup-final/

[4] ttps://www.rugbyworldcup.com/2023/news/888879/new-zealand-rugby-world-cup-2023-review

[5] ttps://www.springboks.rugby/news-features/articles/2023/08/11/scared-kolisi-reveals-rwc-fears/

[6] ttps://www.bbc.com/sport/rugby-union/66839040

[7] ttps://www.tntsports.co.uk/rugby/world-cup/2023/south-africa-v-ireland-rugby-world-cup-live_sto9806717/story.shtml?welcome=eurosport

[8] ttps://www.news24.com/citypress/news/malema-u-turns-on-his-springboks-praise-blames-it-on-slip-in-political-consciousness-20231106

[1]

[2]

[3]

[4]

[5]

[6]

[7]

[8]